Cefnogi addysgwyr ar faterion diogelwch ar-lein 2022

Teimlai addysgwyr yn aml fod ganddynt ddull rhy adweithiol o fynd i’r afael â materion diogelwch ar-lein, yn seiliedig ar fynd i’r afael â materion gyda myfyrwyr wrth iddynt godi. Cododd hyn bryderon i athrawon, a oedd yn teimlo eu bod yn gyson ar y droed ôl ac yn ei chael yn anodd rhoi’r amser yr oedd ei angen ar ddiogelwch ar-lein i allu achub y blaen ar faterion. Roedd diffyg gwybodaeth am lwyfannau ar-lein a gweithredoedd myfyrwyr hefyd yn gwaethygu'r broblem hon i athrawon.

Dywedodd rhai athrawon eu bod yn teimlo’n gyfforddus yn addysgu diogelwch ar-lein, ond eu bod yn teimlo’n llai parod i ymdrin â materion bugeiliol pan fyddant yn codi. Gallai hyn fod oherwydd ansicrwydd ynghylch pa faterion sy’n dod o fewn cylch gorchwyl yr ysgol a sut i drafod pynciau fel cynnwys rhywiol neu dreisgar mewn modd sy’n briodol i’w hoedran.

Yn ogystal, gallai'r newid cyson yn nhirwedd y cyfryngau cymdeithasol ei gwneud hi'n anodd cael y wybodaeth ddiweddaraf. Roedd hyn, ynghyd â natur unigryw y rhan fwyaf o achosion, yn ei gwneud yn anodd sefydlu polisïau ysgol gyfan i arwain eu hymagwedd.

Roedd cyfran fawr o'r rhai a ddefnyddiodd adnoddau'n uniongyrchol gyda grwpiau llai o fyfyrwyr yn defnyddio'r deunyddiau'n amlach - yn dymhorol yn hytrach nag yn flynyddol - o gymharu â'u defnydd mewn dosbarthiadau. Gellir priodoli hyn i natur adweithiol darpariaeth diogelwch ar-lein, lle mae materion bugeiliol a brofir gan fyfyrwyr yn ysgogi trafodaethau mwy targedig.

Graddiwyd ansawdd cyffredinol yr adnoddau presennol fel cyfartaledd. Mae'r diffyg ymateb cadarnhaol clir hwn yn dangos bod athrawon yn teimlo bod lle i wella o ran ansawdd yr adnoddau sydd ar gael iddynt.